Prokuroria Themelore në Ferizaj, ka njoftuar se ka kërkuar nga Gjykata Themelore në Ferizaj, caktimin e masës së paraburgimit në afat prej 30 ditësh ndaj gjashtë të dyshuarve tjerë për vrasjen e rreshterit Muhamed Lika, më 1 prill në Kaçanik.
Në njoftim thuhet se ekziston dyshimi i bazuar që të pandehurit H.B., R.M., V.Ç., E.L., Sh.K., dhe D.G. duke vepruar në bashkëkryerje, me dashje dhe përgatitje paraprake kanë planifikuar për ta privuar nga jeta rreshterin Lika.
“Sipas Prokurorisë, ekziston dyshimi i bazuar se me datë 01.04.2025, rreth orës 23:00, në Kaçanik, në rrugën “Idriz Seferi”, përkatësisht në katin e II-të të hyrjes së ndërtesës, të pandehurit duke vepruar në bashkëkryerje, me dashje dhe përgatitje paraprake kanë planifikuar për ta privuar nga jeta tani të ndjerin zyrtarin e policisë, rreshterin M.L., me detyrë në Stacionin Policor në Kaçanik, ku viktima pas përfundimit të orarit të punës ora 22:53, rrugës për në banesën e tij, i njëjti ishte përcjell në vazhdimësi nga madhorët deri te hyrja e banesës së tij ku pasi që hynë në objektin e banesës ku ka jetuar duke u ngjitur shkallëve, i mituri i shkon nga mbrapa dhe pasi që viktima hynë në objektin banesor, i mituri me të takuar të ndjerin ka shtënë në drejtim të tij me armë zjarri dhe në vend ngjarje janë gjetur katër gëzhoja të kalibrit 9.19 mm dhe nga plagët e marra nga predhat e armës së zjarrit, viktima M.L., ka ndërruar jetë, me këtë në bashkëkryerje, të pandehurit do të kryenin veprën penale “Vrasje e rëndë”nga neni 173 paragrafi 1 nën paragrafi 1.9 lidhur me nenin 31 të Kodit Penal të Republikës së Kosovës Nr. 06/L-074”, thuhet në komunikatë.
Të pandehurit që nga data 22 prill me vendim të Prokurorit të Shtetit gjenden nën masën e ndalimit 48 orësh për veprën penale të lartëcekur.
Ndryshe, gjatë një aksioni të gjerë policor mëngjesin e së hënës si të dyshuar për “planifikimin dhe kryerjen e vrasjes” e rreshterit Muhamed Lika janë arrestuar shtatë persona, në mesin e të cilëve një 18-vjeçar.
Këtë e kanë bërë të ditur drejtori i Përgjithshëm i Policisë së Kosovës, Gazmend Hoxha dhe kryeprokurori i Prokurorisë Themelore në Ferizaj, Burim Çerkini, gjatë një konference për media.
Hoxha: Shtatë persona të dyshuar janë arrestuar për vrasjen e rreshterit, Muhamed Lika
Gjykata Themelore në Ferizaj të hënën e ka aprovuar kërkesën e Prokurorisë Themelore të Ferizajt, për caktimin e masës së paraburgimit kundër të miturit të dyshuar për vrasjen e rreshterit Muhamed Lika më 1 prill në Kaçanik.
Caktohet 1 muaj paraburgim për të miturin e dyshuar për vrasjen e rreshterit Lika
