Lista Serbe ka shpallur tre ditë zie për vdekjen e tre sulmuesve serbë të cilët u vranë në Banjskë të Zveçanit. Ky veprim nga ana e këtij subjekti politik, sipas njohësve të proceseve juridike e politike kërkon intervenim të menjëhershëm nga institucionet gjegjëse të vendit, pasi është anti-kushtetues.
LS shpall tri ditë zie për terroristët e vrarë serbë.
Subjekti më i madh politik serb, që vepron në Kosovë, Lista Serbe ka shpallur tre ditë zie në mjediset e banuara me shumicë serbe.
Ky vendim erdhi në shenjë nderimi për vdekjen e disa pjestarëve të bandës kriminale terroriste serbe, që sulmuan policinë e Kosovës të dielën.
Veprimet e tilla mbështetëse ndaj një bande terroriste, të një partie që operon në jetën politike të Kosovës, njohësit e proceseve juridike dhe politike, e konsiderojnë edhe këtë fundit një prej tyre.
Njohësi i çështjeve juridike e kushtetuese, Mazllum Baraliu thekson nevojën e menjëhershme për intervenim nga institucionet gjegjëse.
“Këtu kemi një solidarizim fatëkeq, një grup terrorist që në fakt paraqet aggression të një shteti tjetër të organizuar përmes një grupi tjetër të terrorit dhe kriminalitetit. Është për të ardhur keq ky veprim I kësaj partie politike dhe është kundër rendit politik dhe kushtetues të Kosovës……..pra luan rolin e sovranit, rolin e shtetit në shtet pa e merituar në kundërshtim me ligjet në fuqi. Kjo duhet trajtuar me seriozitetin ma të madh, me kujdes pa vonesë dhe pa nguti”, tha njohësi i qështjeve juridike dhe kushtetuese, Mazllum Baraliu.
Edhe sipas profesorit universitar Dorajet Imeri, ky subjekt politik qysh në fillim është ideuar si projekt i dëmshëm për vendin.
“Strukturat aktuale të dëshmuara sipas policisë, pjesëmarrës në grupin terrorist, që disa prej të cilëve u eliminuan fizikisht e disa të tjerë u arrestuan, kanë lidhje të drejtpërdrejtë me strukturën udhëheqëse, ose janë vet struktura udhëheqëse e Listës Serbe…mund të përmblidhet si një parti terroriste, ose grup terrorist, synimi i të cilës është rrënimi i sistemit politik dhe kushtetues të Rep. të Kosovës”, u shpreh njohësi i qështjeve politike, Dorajet Imeri.
Policia e Kosovës, mengjesin e së dielës derisa ishte në patrollim të rregullt u sulmua nga një grup i armatosur, ku për pasojë u vra polici i Kosovës, Afrim Bunjaku, ndërsa disa të tjerë u plagosën.
