Nuk janë të rralla rastet kur qentë endacakë helmohen.
Një gjë e tillë dyshohet se ka ndodhur edhe gjatë kësaj jave në veri të Mitrovicës.
Nënkryetari i Kuvendit Komunal të Mitrovicës së Veriut, Skënder Sadiku tha për tëvë1 se helmimi i disa qenve ka ndodhur në dy lagje.
“Këto ditë është bërë një helmim masiv ndaj kafshëve të pambrojtura, sidomos qeneve. Bëj apel që të gjithë të ruajnë jo vetëm qytetarët, por edhe kafshët të jenë të mbrojtura. Informacioni është marrë nga organizata që kujdeset për kafshët ‘Shapa’”, tha Sadiku.
Tëvë1 ka tentuar të marrë një qëndrim nga kjo organizatë, por të njëjtit nuk kanë kthyer përgjigje.
Derisa rastin e kanë konfirmuar nga Policia në veri të Mitrovicës.
Ata bënë të ditur se janë duke kryer hetime.
“Ne dy lokacione janë gjetur disa qenë të ngordhur. Njësitë policore kanë dalë në vendngjarje dhe kanë informuar edhe Agjencionin e Ushqimit dhe Veterinarisë. Për rastin është njoftuar edhe prokurori i shtetit, ku aktualisht rasti mbetet në procedurë zyrtare. Policia po e heton rastin”, thuhet nga Policia e Mitrovicës.
Televizioni ka kontaktuar edhe Klinikën Veterinare përgjegjëse në Mitrovicë të Veriut, por të njëjtit kanë qenë të paqasshëm.
Kronikë e realizuar nga gazetarja, Adea Mustafaj.
