Afër tetë mijë persona aplikuan për t’u bërë pjesë e programeve të Universitetit të Prishtinës në afatin e parë.
Pavarësisht interesimeve të larta, UP-ja e universitetet tjera vendore nuk po vlerësohen mirë sa i përket cilësisë.
Platforma botërore e renditjes së universiteteve, Uebometrics, e ka ranguar UP-në në vendin e 3031 në mesin mbi 30 mijë universiteteve të botës. Krahasuar me universitetet e rajonit, UP është shumë më poshtë universiteteve të Beogradit, Zagrebit e Podgoricës.
E për t’u vlerësuar më mirë ish-drejtori i Bordit të Agjencisë Kosovare të Akreditimit, Blerim Rexha thotë se duhet të rritet mbështetja për punimet shkencore të stafit akademik.
“Në rend të parë duhet të përmirësohet numri i punimeve shkencore. Uebometriksi për këtë merr dy parametra, nga Google Scholar dhe platforma Scimago dhe Universiteti i Prishtinës duhet të rrisë mbështetjen për punë shkencore të stafit të saj akademik”, tha Rexha.
Kurse drejtori i Institutit EdGuard, Rinor Qehaja thotë se këto institucione duhet të çkapen.
“Fillimisht duhet të bëhet çkapja e këtyre institucioneve publike të arsimit të lartë nga individë dhe grupe të ndryshme dhe të interesit të cilët i kanë ngulfatur këto institucione dhe pastaj të kthehet vëmendja te studenti. Aktualisht i tërë debati dhe vëmendja institucionale e këtyre universiteteve është i orientuar te profesori si individ, te avancimi, publikimi dhe rekrutimi – por shumë pak ka vëmendje te cilësia e studimeve”, tha Qehaja.
Lidhur me rangimin nga Uebometrics, ditë më parë reagoi edhe Ministria e Arsimit të cilët thanë se kanë filluar të punojnë në këtë drejtim, duke identifikuar mangësitë dhe duke ndërmarrë nisma strategjike për ta avancuar tutje pozicionin.
Uebometrics analizon universitetet në bazë të vëllimit të përmbajtjes nëpër ueb-faqet e tyre dhe impaktin e publikimeve bazuar në citimet që ato marrin.
Raporti i gazetarit Gojart Jashari.