Çmimet e produkteve ushqimore kanë shënuar ngritje edhe në muajin tetor.
Krahasuar me vitin e kaluar po në këtë periudhë, sipas Agjencisë së Statistikave të Kosovës, çmimet e konsumit janë rritur për 5.1%.
Sipas këtyre të dhënave, pushimet e organizuara kanë shënuar ngritje për 23.7%, biletat e fluturimeve për 21%, e energjia elektrike për 20.3%.
Por jo vetëm këto, shtrenjtim ka pasur edhe te pemët, kafja, çaji, mishi, buka, si dhe lëndët djegëse të ngurta, drutë e veleti.
Mirëpo nga Shoqata e Konsumatorëve thonë se rritja e çmimeve është më e lartë sesa këto statistika të ASK-së.
“Rritja është shumë e lartë, pasi ne në treg kemi manipulime me vëllim, me sasi, me peshë, me cilësi, me komponentë, me afat, qëndrueshmëri, e që është rritja më e lartë, edhe një pikë është rritja e energjisë elektrike. Derisa është proklamuar rritja prej 16%, ne tash nga Agjencia po shohim se kemi një rritje prej 22% për qind”, thotë Selatin Kaçaniku nga Shoqata e Konsumatorëve.
E këto çmime, sipas profesorit të ekonomisë ndikojnë te mirëqenia e qytetarëve.
“Ajo që është më e rëndësishmja dhe që ndikon te mirëqenia e qytetarëve është rritja e inflacionit për shportën e konsumatorit, respektivisht për gjërat ushqimore të cilat kanë pësuar një rritje vetëm në tetor deri në 13%. Kështu që ajo që ndikon në ekonomi është më e ndikueshme në mirëqenien e qytetarëve”, deklaron profesori Remzi Smajli.
Prandaj ai kërkon që të ndërmerren masa nga institucionet e vendit.
“Masat që duhet ndërmarrë, Qeveria është që në përgjithësi të përkrah bizneset, të përkrah ekonominë në mënyrë që ata të mos i ngrisin çmimet si dhe një kontroll më e shtuar e institucioneve, do ta këtë pjesë të inflacionit”, thotë ai.
Në muajin shtator, ASK kishte raportuar se çmimet ishin rritur për 4.7 përqind krahasuar me shtatorin e vitit të kaluar.
