Diskutimet e ditëve të fundit kanë të bëjnë me atë se çfarë mesazhi do të sjellin pesë emisarët në Kosovë e Serbi.
Nga Bashkimi Evropian kanë njoftuar se pesë diplomatët do të kërkojnë nga palët vazhdimin e procesit të normalizimit dhe zbatimin e obligimeve të marra nga ky proces.
Nga ana tjetër institucionet e Kosovës kanë deklaruar se siguria është prioriteti kryesor aktualisht dhe se pa të nuk mund të ketë normalizim.
Njohësi i çështjeve politike, Melazim Koci, thotë se qeveria duhet të punojë për çështjet e tjera, paralelisht me dialogun.
“Qëndrimi i Qeverisë së Kosovës që çështja e sigurisë është prioritare, është i drejtë dhe qëndron, por nuk duhet të shndërrohet në bunkerizim, në bllokim të procesit politik që vije përmes pesëshes euro-amerikane, përkatësisht marrëveshjes franko-gjermane. Unë mendoj që këto janë dy procese që duhet të shkojnë paralelisht dhe të mos e pengojnë njëra-tjetrën”, tha Koci.
Njohësi i procesit të dialogut, Visar Xani, thotë se kërkesat e Kosovës në dialog duhet të jenë të konsultuara paraprakisht me aleatët.
“Prioriteti i dialogut duhet të jetë i lartë për Kosovën, kërkesat e Kosovës duhet të jenë të arsyeshme atëherë kur nuk bije ndesh me ata që e bëjnë lehtësimin e dialogut dhe që na mbështesin në këtë proces të dialogut. Emisarët janë shumë të rëndësishëm për të vazhduar dhe për të gjetur formulën e suksesit të dialogut, për shkak se ky proces pa një formulë të suksesit nuk po jep rezultat”, deklaroi Xani.
Është raportuar se përfaqësuesi amerikan, ai i Bashkimit Evropian, i dërguari gjerman, francez dhe ai italian do të sjellin një plan konkret për zbatimin e marrëveshjes e që pritet të ketë edhe afatet kohore brenda tij.
