Kushtet e presidentit Vladimir Putin për t’i dhënë fund luftës në Ukrainë përfshijnë një kërkesë që udhëheqësit perëndimorë të zotohen me shkrim për të ndaluar zgjerimin e NATO-s drejt lindjes dhe për të hequr një pjesë të sanksioneve ndaj Rusisë, kanë thënë për Rueters tre burime ruse me njohuri për negociatat.
Presidenti i Shteteve të Bashkuara, Donald Trump, ka thënë disa herë se dëshiron t’i jap fund luftës në Ukrainë dhe në ditët e fundit është shfaqur gjithnjë e më i frustruar me Putinin, duke paralajmëruar të martën se lideri rus po “luan me zjarr” duke refuzuar të angazhohet në bisedime për armëpushim me Kievin.
Presidenti ukrainas po qëndron në Berlin për vizitë zyrtare , dhe ka thënë se shpreh gatishmëri për një takim tre-palësh me presidentin amerikan dhe atë rus, megjithëse ka përsëritur disa herë aspiratat e Ukrainës që të jetë pjesë e NATO-së, përkundër kërkesës ruse.
Ndërkohë, luftimet vazhdojnë, teksa forcat ruse kanë deklaruar se kanë marrë edhe katër fshatra kufitare në rajonin verilindor të Sumy-t në Ukrainë, tha të martën një zyrtar lokal, disa ditë pasi Presidenti rus Vladimir Putin tha se kishte urdhëruar trupat të krijonin një zonë tampon përgjatë kufirit.
