Ish-ministri i Mbrojtjes, Armend Mehaj ka reaguar pas kërcënimeve për pushtim që ka bërë presidenti serb, Aleksander Vuçiq. Mehaj i ka kujtuar atij, se Kosova është shumë më e fortë se ajo e viteve ’98-99.
Duke iu referuar armatosjeve të fundit me armë moderne, Mehaj ka thënë se shteti ynë është shumë më i fortë se sa duket në pamje të parë.
“Kërcënimet e Vuçiçit, kundër shtetësisë, sovranitetit dhe tërësisë territoriale të Kosovës, janë permanente dhe përbejnë dëshmi se shteti serb nuk ka mundur dhe nuk ka ndryshuar, por vetëm e ka vazhduar politikën hegjemoniste serbo-madhe. I rikujtoj presidentit serb, se Kosova është shumë herë më fortë se ajo e viteve 1998-1999, dhe mbi të gjitha në ndërtimin e kapaciteteve të saja ushtarake. Armatosja e kësaj të fundit nga armët me moderne, janë dëshmi me e paktë se shteti i jonë është me i fortë se sa duket në pamje të parë”, ka shkruar ai në Facebook.
Mehaj më tej, ka siguruar qytetarët se Kosova ka nivelin më të mirë të mundshëm të sigurisë.
“I siguroj gjithë qytetarët e Republikës së Kosovës, që siguria e jonë është në nivelin me të mirë të mundshëm, kjo fal rritjeve të kapaciteteve të Ushtrisë sonë, Policisë sonë e organeve të shërbimeve inteligjente të Kosovës, rritje kjo e bere fal mbështetjes së NATO-së dhe Shteteve të Bashkuara të Amerikës”, ka shtuar ai.
