Tre pjesëtarë të Policisë së Kosovës janë kidnapuar në “mënyrë të organizuar” sipas PK-së nga njësitet speciale serbe, të mërkurën brenda territorit të Kosovës.
Pas këtij rasti, ka pasur edhe reagime për mënyrën e kidnapimit të tyre dhe nëse ata do duhej të reagonin.
E për këtë ka folur edhe zëdhënësi i PK-së, Baki Kelani në konferencën e jashtëzakonshme për media.
Ai tha se policët kanë të drejtë të përdorin çdo mjet të mundshëm, por ka thënë se ky rast ka qenë një veprim i organizuar i kidnapimit klasik.
“Çdo zyrtar policor i di detyrat e veta se si duhet të veprojë dhe si janë të përcaktuara edhe me ligj, por edhe si janë të përcaktuara me procedurë. Mirëpo, nganjëherë situata dhe forma e rastit të dirigjon ndryshe dhe në këtë rast, duke e parë që ka qenë një veprim i organizuar për një kidnapim klasik, ka ndodhur ky rast ashtu siç ka ndodhur. Në raste tjera normal që zyrtarët policorë kanë të drejtën të përdorin çdo mjet të mundshëm, mirëpo ka qenë një kidnapim klasik i organizuar”, tha Kelani.
