Korporata Energjetike e Kosovës (KEK) thotë se nuk ka kolaps prodhimi, derisa tregon se operimi i njësive prodhuese vazhdon normalisht.
Në njoftimin për media është thënë se njësitë e Termocentralit “Kosova A” dhe “Kosova B” janë të stërvjetruara dhe përballen me defekte teknike të paplanifikuara dhe të vështira për t’u parashikuar me saktësi.
Ndërkohë, është bërë e ditur se Njësia A3, është rikthyer në operim dhe po funksionon normalisht.
Ndërkaq, për njësinë B1, KEK-u ka njoftuar se planifikon ta ndalë nga mëngjesi i së shtunës.
Kjo për shkak të vështirësive teknike që lidhen “me rritjen e humbjeve të ujit në kaldajë, rrjedhjet e avullit në sistemin e gypave dhe sinjalizimin e një defekti në filtrin elektrik”.
“Pavarësisht përpjekjeve maksimale për ta mbajtur në operim, ndalja e saj është planifikuar të ndodhë në orët e para të mëngjesit të 21.06.2025, me qëllim të evitimit të ndonjë avarie më të madhe apo të paparashikueshme që mund të cenonte sigurinë teknike të njësisë dhe sistemit në tërësi”, thuhet në njoftimin e KEK-ut.
E rikthimin e kësaj njësie në operim të plotë, KEK-u ka thënë se po përpiqet ta bëjë në afatin e parashikuar prej 48 orësh.
Gjatë ditës, KESCO paralajmëroi për mungesë të prodhimit të energjisë elektrike, duke bërë thirrje për kursim. /teve1.info/
KESCO paralajmëron mungesë të prodhimit të energjisë elektrike nga nesër – Thirrje për kursim
