KEDS-i ka bërë të ditur se gjatë vitit 2023, 6715 konsumatorë-keqpërdorues të energjisë elektrike, janë detyruar t’i rikthejnë humbjet.
Sipas kësaj kompanie, vlera më e madhe që një konsumator komercial është detyruar t’ia kthejë asaj në kuadër të rikthimit të humbjeve vitin e kaluar është 52 mijë e 489 euro.
“Vetëm përgjatë vitit 2023, nga afro 100 mijë kontrolle, KEDS zuri fiks 6,715 konsumatorë-keqpërdorues duke e vjedhë energjinë elektrike. Për këtë periudhë ata janë obliguar t’i rikthejnë humbjet, që konsiderohet hapi i parë në kuadër të një sërë pasojash që i presin ata”, tha KEDS-i.
KEDS-i thotë se humbjet komerciale po shkaktohen nga lidhjet direkt në rrjet.
“Fenomeni i keqpërdorimit të energjisë elektrike që në praktikë klasifikohet si humbje komerciale, është i barabartë me diferencë ndërmjet energjisë së konsumuar dhe energjisë së faturuar. Humbjet komerciale po shkaktohen nga lidhjet direkt në rrjet, manipulimet në njehsorët elektrikë dhe metoda të tjera klandestine të devijimit nga pika matëse nga konsumatorë të pandërgjegjshëm”, thuhet në një njoftim.
KEDS-i thekson mes tjerash se po vazhdon të realizojë rreth katërqind kontrolle ditore në mbarë Kosovën për identifikimin e keqpërdoruesve të energjisë elektrike, duke e rritur numrin e ekipeve të kontrollit dhe intensifikimin e tyre.
KEDS iu ka bërë thirrje të gjithë konsumatorëve që të mos e keqpërdorin energjinë elektrike./teve1.info/
