Anamorava është rajoni më i prekur nga ndërprerjet e energjisë elektrike si pasojë e reshjeve të mëdha të shiut, breshërit dhe erërave të fuqishme që goditën Kosovën pasditen e së hënës.
Kompania për Distribuimin e Energjisë Elektrike në Kosovë (KEDS) ka bërë të ditur se një numër i konsiderueshëm i konsumatorëve kanë mbetur pa energji elektrike, veçanërisht në qytetin e Gjilanit dhe rrethinës.
“Reshje të mëdha shiu, breshëri dhe erëra të fuqishme kanë përfshirë pasditen e të hënës Kosovën, veçanërisht rajonin e Anamoravës. Si pasojë, janë shkaktuar ndërprerje të energjisë elektrike për një numër të konsiderueshëm të konsumatorëve,” thuhet në njoftimin e KEDS-it.
Sipas kompanisë, ekipet teknike janë të mobilizuara maksimalisht dhe po punojnë pa ndërprerje në terren për të rikthyer furnizimin me rrymë sa më shpejt që të jetë e mundur.
Ndërkohë, sipas KEDS-it, rajonet e Pejës, Ferizajt dhe Prizrenit janë prekur më pak, por edhe atje janë duke u zhvilluar ndërhyrje nga ekipet përkatëse.
KEDS-i ka falënderuar qytetarët për durimin dhe mirëkuptimin e treguar gjatë kësaj situate të vështirë, duke theksuar se është e angazhuar për zgjidhjen sa më të shpejtë të problemeve të shkaktuara nga moti i lig.
