Instituti Demokratik i Kosovës (KDI) ka reaguar pas dështimit të seancës konstituive edhe për herën e dytë.
KDI ka thënë se shpreh shqetësim të thellë për dështimin e përsëritur të Kuvendit për të miratuar raportin e Komisionit të Përkohshëm për Verifikimin e Mandateve, një ndër hapat e domosdoshëm drejt konstituimit të Kuvendit dhe fillimin e punës së legjislaturës së re.
KDI ka vlerësuar se mbyllja e seancës nga kryesuesi, Avni Dehari përbën shkelje të rregullores së Kuvendit
“KDI vlerëson se mbyllja e sotme e seancës konstituive nga ana e Kryesuesit të saj, deputetit Avni Dehari, përbën shkelje të rregullores dhe praktikës parlamentare, pasi ajo u ndërpre pa u realizuar votimi për raportin nga Komisioni i Përkohshëm dhe pa u konsumuar asnjë nga pikat e rendit të ditës. Një veprim i tillë, që anashkalon procedurat pa vendim formal të Kuvendit, cenon seriozisht legjitimitetin e procesit dhe i shton më tej paqartësitë rreth funksionimit të seancës”, thuhet në komunikatë.
Instituti Demokratik i Kosovës i ka bërë thirrje kryeministrit në detyrë dhe ministrave që të japin dorëheqje formale për të mundësuar vazhdimin e seancës konstituive.
“Gjithashtu, Fakti që Kuvendi nuk po arrin të verifikojë mandatet për shkak të këtij ngërçi të krijuar nga mungesa e dorëheqjeve formale tregon për një mungesë të vullnetit për të respektuar ligjin dhe për të lejuar funksionimin normal të institucioneve. Ky veprim, apo më saktë mosveprim, nga ana e anëtarëve të Qeverisë në detyrë, po e kthen një procedurë standarde dhe të thjeshtë – në një krizë të panevojshme politike dhe institucionale. KDI u bën thirrje Kryeministrit dhe ministrave në detyrë, që kanë fituar mandate si deputetë, që të respektojnë detyrimin e qartë ligjor për dorëheqje formale nga pozitat ekzekutive, në mënyrë që të mundësohet përfundimi i seancës konstituive të Kuvendit”, thuhet tutje.
