Basketbollistet e Bashkimit kanë vazhduar dominimin e plotë në basketbollin kosovar. Bashkimi për herën e dytë rresht ka fituar tre trofetë, Superkupën, Kupën dhe titullin e kampionit të Kosovës.
Titullin e kampionit për këtë edicion, Bashkimi e siguroi të martën në palestrën “Sezai Surroi” në Prizren. Në ndeshjen e tretë të kësaj serie, Bashkimi triumfoi me shifrat 72:53 ndaj Prishtinës për ta fituar këtë seri me rezultatin e përgjithshëm 3:0 dhe për ta fituar titullin.
Për Bashkimin, ky është titulli i tetë në histori të klubit, ndërsa me mbrojtjen e tripletës ekipi nga Prizreni ka shkruar historinë në basketbollin e Kosovës.
Bashkimi u tregua ekip më i mirë se Prishtina dhe pothuajse dominoi gjatë tërë ndeshjes. I fitoi tre çerekë, ndërsa dallimin e bëri në dy periudhat e para pasi në pushimin mes pjesëve shkoi me avantazh prej 15 pikëve – 37:22. Prishtina e fitoi çerekun e tretë 20:14, përpara se Bashkimi ta fitoi periudhën e fundit 21:11 për ta konfirmuar fitoren.
Më e dalluara te Bashkimi në këtë fitore ishte amerikania Adrienne Godbold që realizoi 26 pikë e 11 kërcime. Me lojë të mirë te Bashkimi u dalluan edhe Arbnore Perquku që kontribuoi me 14 pikë e 11 kërcime, pastaj Sarah Mgbeike me 10 pikë e `15 kërcime, si dhe Diedona Halitaj me 15 pikë të shënuara.
Te Prishtina, tri basketbolliste e mbyllën ndeshjen me pikë dyshifrore kurse më efikasja ishte Jade Williams. Williams pati 15 pikë e 11 kërcime, Malvina Haziri shtoi 14 pikë kurse Elektra Zykaj 10 sosh, por nuk arritën ta evitojnë humbjen.
Çmimin MVP për lojtaren më të mirë të serisë finale, e fitoi qendra amerikane e Bashkimit, Adrienne Godbold. Ndërkohë, trofeun e kampionit e ngriti kapitenia Aulona Muhadri.
