Krah-qendra Josh Nzeakor është përforcimi më i ri i Sigal Prishtinës për sezonin 2024/25 në Superligën e Kosovës në basketboll.
Sigal Prishtina, të martën e ka prezantuar 27-vjeçarin, i cili i bashkohet ekipit pak ditë para turneut të Superkupës së Kosovës që mbahet këtë javë në Prizren.
Nzeakor, së fundmi ka luajtur në G-League të SHBA-së, ndërsa karrierë ka bërë edhe në Argjentinë, Francë, Gjermani, Guine, Meksikë e Mali.
Ai bëhet huaji i katërt te Sigal Prishtina për sezonin e ri që nis në fund të këtij muaji.
Para Nzeakorit, Prishtinës i janë bashkuar Rashad Williams, Jalen Moore e Damiree Burns. Në krye të ekipit për sezonin e ri, do të jetë trajneri nga Turqia, Murat Bilge.
Turneu i Superkupës që paralajmëron fillimit e sezonit të ri në Superligë, do të nis të shtunën kurse Sigal Prishtina në çerekfinale do të përballet me Vëllaznimin.
Ndërkohë, shorti për sezonin e ri në elitën e basketbollit kosovar do të hidhet të enjten prej orës 11:00 në zyret e Federatës së Basketbollit të Kosovës.
