Skuadra e Pejës do të përballet me Proton Cable Prizrenin në kuadër të Superligës së Kosovës në basketboll.
Kjo përballje luhet sot prej orës 19:00 në palestrën “Karagaçi” në Pejë dhe i takon xhiros së dytë.
Në fakt, kjo është ndeshje e mbetur dhe ishte shtyrë me kërkesën e Pejës për shkak të angazhimeve që i kishte në kualifikimet për FIBA Europe Cup.
Pejanët po synojnë të rikthehen te fitorja këtë sezon në kampionat pas humbjes që e pësuan vikendin e shkuar në shtëpi nga Golden Eagle Ylli.
Në fakt, Peja ka dy humbje dhe një fitore deri më tani në Superligë, pasi ka pësuar edhe nga Vëllaznimi në kuadër të xhiros së parë.
Gjithashtu, Peja në këtë ndeshje do të jetë edhe pa trajnerin Rami Hadar, i cili ditë më parë dha dorëheqje duke u larguar edhe nga posti i selektorit të Kombëtares së Kosovës.
Në anën tjetër, Proton Cable Prizreni ka bilanc të njëjtë sikurse Peja pas tri ndeshjeve të zhvilluara dhe synon fitoren në këtë duel pas disfatës që e pësoi në xhiron e katërt nga Vëllaznimi.
Të dyja ekipet kanë tubuar nga katër pikë dhe renditen në pjesën e poshtme të tabelës së bashku me Borën, skuadër kjo që po debuton në Superligë dhe ende nuk di për fitore.
