Të paktën katër persona u vranë dhe tetë të tjerë u plagosën pasi një person i armatosur drejtoi një automjet në një kishë në Michigan, hapi zjarr dhe i vuri flakën ndërtesës, përpara se të vritej edhe vetë, tka thënë policia, raporton BBC.
Zyrtarët thanë se sulmi në Kishën e Jezu Krishtit të Shenjtorëve të Ditëve të Mëvonshme në Grand Blanc, një qytet 100 km në veriperëndim të Detroitit, ndodhi gjatë një shërbese të së dielës ku morën pjesë qindra njerëz.
I dyshuari, i identifikuar si Thomas Jacob Sanford, 40 vjeç, nga Burton, Michigan, u qëllua për vdekje më vonë nga policia në parkingun e ndërtesës.
Autoritetet po e hetojnë incidentin si një “akt dhune të synuar”, por thonë se motivi mbetet i paqartë.
Të dhënat tregojnë se Sanford ishte një veteran i Korpusit të Marinës, raportoi partneri amerikan i BBC-së, CBS.
FBI-ja po udhëheq hetimin dhe ka dërguar ekipe reagimi ndaj krizave, teknikë të bombave dhe të tjerë në vendngjarje, sipas Reuben Coleman, agjentit special në detyrë përgjegjës për zyrën e FBI-së në Detroit.
Presidenti amerikan, Donald Trump tha se ishte informuar për të shtënat dhe konfirmoi se FBI do të udhëheqë hetimin federal.
Duke shkruar në Truth Social, ai e përshkroi atë si “një tjetër sulm të synuar ndaj të krishterëve në Shtetet e Bashkuara të Amerikës”.
