Gjykata Themelore në Gjakovë ka caktuar masën e arrestit shtëpiak prej një muaji ndaj katër ish-zyrtarëve të Komunës së Gjakovës, të dyshuar për veprën penale “Keqpërdorim i pozitës apo autoritetit zyrtar”.
Sipas njoftimit të gjykatës, në mesin e të dyshuarve janë A.B., ish-drejtor i Drejtorisë për Urbanizëm dhe Mbrojtje të Mjedisit, dhe E.B., ish-udhëheqëse e Sektorit Urbanistik, të cilët dyshohet se gjatë viteve 2018 dhe 2019 kanë miratuar parcelime të kundërligjshme të pronave publike në favor të palëve të treta.
Personat përfituese nga këto vendime dyshohet të jenë A.L., M.Ll. dhe Sh.B., ndërsa dëmi i shkaktuar sipas aktakuzës ka prekur pronën e Komunës së Gjakovës dhe të Këshillit të Bashkësisë Islame (KBI) në këtë komunë.
Po ashtu, të dyshuar janë edhe A.L., ish-drejtoreshë për Kadastër, Gjeodezi dhe Pronë, dhe juristi A.K., për veprime të dyshimta gjatë vitit 2019, ku sipas Prokurorisë kanë tejkaluar kompetencat duke miratuar regjistrime të paligjshme të parcelave, në kundërshtim me legjislacionin përkatës.
Prokuroria kishte kërkuar masën e paraburgimit për të pandehurit, mirëpo gjyqtari i procedurës paraprake ka vlerësuar se arresti shtëpiak është masë e mjaftueshme për të siguruar paraqitjen e tyre gjatë hetimeve dhe për të parandaluar përsëritjen e veprës penale.
Masa e arrestit shtëpiak është caktuar nga data 23 korrik deri më 23 gusht 2025, ndërsa të pandehurit kanë të drejtë ankese në Gjykatën e Apelit të Kosovës kundër këtij vendimi.
