Të paktën 15 persona, përfshirë katër fëmijë, kanë vdekur për shkak të urisë dhe kequshqyerjes në Gaza, ka thënë Ministria e Shëndetësisë, transmeton Al Jazeera.
Kjo e çon numrin e përgjithshëm të vdekjeve të lidhura me urinë në Rrip në 101, përfshirë 80 fëmijë, që kur Izraeli nisi luftën e tij në Gaza në tetor 2023.
Kurse të paktën 43 palestinezë, përfshirë 10 kërkues ndihmash, janë vrarë në sulmet në të gjithë Gazën që nga agimi i së martës, një ditë pasi tanket hynë për herë të parë në pjesët jugore dhe lindore të Deir el-Balah.
Drejtoresha e organizatës humanitare “Save the Children”, Rachel Cummings e ka përshkruar situatën në Gaza për fëmijët dhe familjet e tyre si “katastrofike”.
Duke folur për Al Jazeera nga Deir el-Balah në Gazën qendrore, ajo tha se nuk ka pasur furnizim të mjaftueshëm me ushqim në Gaza për një kohë shumë të gjatë.
Tregjet janë bosh dhe situata e kanalizimeve të ujit nuk është e mjaftueshme për të përmbushur nevojat e 2 milionë njerëzve, “të cilët janë të gjithë në prag të urisë”, tha ajo.
Ajo tha se në Deir el-Balah kishte parë “njerëz të uritur, fëmijë që mbanin tasa bosh, duke kërkuar ushqim, duke kërkuar ujë. Është absolutisht e dëshpëruar këtu”.
“Po shohim një numër në rritje të fëmijëve në klinikat dhe qendrat tona të ushqyerjes që janë të kequshqyer… Po shohim gjithashtu një rritje të numrit të grave shtatzëna dhe grave që ushqejnë me gji, të cilat janë gjithashtu të kequshqyera”, tha ajo, duke shtuar “të gjithë në Gaza janë të uritur tani, dhe madje edhe në ekipin tim, shoh qartë se ekipi im është i dobët, dhe gjithashtu ata nuk mund të marrin ushqim në treg.”/teve1/
