Largimi i Luis Enrique nga drejtimi i Spanjës, tani është rritur në gjashtë numri i trajnerëve që janë larguar nga ekipet kombëtare pas Kupës së Botës “Katar 2022”.
Gerardo Martino u largua nga drejtimi i Meksikës, pasi kjo përfaqësuese u eliminua nga Botërori në fazën e grupeve. Rrugën e Martinos e ndjeki edhe Carlos Queiroz i cili u largua nga drejtimi i Iranit, me përfaqësuesen në fjalë që nuk mundi të shkonte përtej fazës së grupeve të Katar 2022.
Zhgënjimi i rënies në fazë të grupeve ishte edhe te Belgjika, e që pritej shumë nga kjo kombëtare. Me rënien nga faza grupore trajneri Robert Martinez, mori vendim për t’u ndarë me Belgjikën.
Ashtu si pararendësit edhe Diego Alonso la drejtimi e Uruguait me ekipin e tij që e mbylli eksperiencën e Katar 2022 në grupe. Otto Addo nga ana e tij pas mbylljes së ndeshjes së fundit në raundin e grupeve, atë të Ganës ndaj Uruguait, lajmëroi largimin nga drejtimi i kombëtares së vendit të tij.
Dhe tashmë “viktima” e fundit e Katar 2022 është Luis Enrique, me Spanjën që u eliminua nga Maroku në raundin e 1/8-ave, duke mos mundur të shkonte në raundin e çerekfinaleve të Kupës së Botës.
