I dërguari i Shteteve të Bashkuara të Amerikës për Ballkanin Perëndimor, Aleksander Kasanof, të premten është takuar me kryetarin e Partisë Demokratike të Kosovës, Memli Krasniqin si dhe me kryetarin e Aleancës për Ardhmërinë e Kosovës, Ramush Haradinaj.
Krasniqi ka thënë se i ka theksuar Kasanofit nevojën e Kosovës për bashkërendim të qëndrimeve me aleatët e saj strategjikë, e veçanërisht me SHBA-në.
“Në Ambasadën e Shteteve të Bashkuara të Amerikës, së bashku me Bedriun dhe Vlorën, takuam Zëvendësndihmës Sekretarin e SHBA-së, Alexander Kasanof. Bashkë diskutuam për zhvillimet aktuale në Kosovë dhe rajon. Në takim ritheksova nevojën e shtetit të Kosovës për bashkërendim të qëndrimeve me aleatët tanë strategjikë, e veçanërisht me SHBA-në. Kosova, si një storie suksesi është rezultat i bashkëpunimit të mirë dhe partneritetit të besueshëm me miqtë e saj. Zëvendësndihmës Sekretarin Kasanof e falënderova për mbështetjen e vazhdueshme të SHBA-së në fuqizimin shtetit tonë. Edhe e ardhmja nuk duhet të jetë ndryshe, përveçse një rrugëtim i përbashkët drejt sukseseve të reja”, ka shkruar Krasniqi në Facebook.
Ndërsa, Haradinaj, është shprehur se e vetmja rrugë për të arritur synimet si shtet, është bashkëpunimi dhe partneriteti me SHBA-të, si aleati strategjik dhe i përjetshëm.
“Sot në ambasadën amerikane takuam Zv. ndihmës Sekretarin e Shtetit, z. Alexander Kasanof. Shfrytëzova rastin që në takim t’i falënderoj z. Kasanof dhe Ambasadorin z. Hovenier për angazhimin e tyre ndaj Kosovës. Mbështetja e fuqishme e ShBA-së ndaj popullit të Kosovës vazhdon përkundër vështirësive të panevojshme që i ka shkaktuar qeveria. E vetmja rrugë për të arritur synimet tona si shtet, është bashkëpunimi dhe partneriteti me SHBA-të, si aleati ynë strategjik dhe i përjetshëm”, ka shkruar Haradinaj.
Të enjten Kasanof është takuar edhe me presidenten Osmani dhe me kryeministrin Kurti./teve1.info/
