Sulmuesi i Ballkanit, Bernard Karrica është shpallur futbollisti më i mirë i xhiros së 35-të në Superligën e Kosovës në futboll, ka njoftuar FFK-ja të hënën.
Karrica është nderuar me çmimin “Ylli i Javës”, i cili i ndahet lojtarit më të mirë pas përfundimit të secilës xhiro.
Komisioni i veteranëve të futbollit, ka konstatuar se Karrica ishte më i miri për xhiron e shkuar pasi ia siguroi Ballkanit titullin e tretë rresht në histori të klubit.
Karrica e shënoi golin e vetëm në fitoren 1:0 në Podujevë në ndeshjen derbi kundër Llapit. Për Karricën, kjo është hera e parë që shpallet më i miri i javës në Superligë, gjë për të cilën është shprehur shumë i lumtur.
“Jam shumë i lumtur që me golin që shënova arritëm të fitojmë dhe të shpallemi kampionë. Ky është sukses i gjithë ekipit”, tha ndër të tjera Karrica për faqen zyrtare të FFK-së.
