Pas fitores ndaj Ukrainës të enjten në mbrëmje, karateistet e Kosovës kanë vazhduar me sukses edhe të premten dhe kanë siguruar luftën për medalje të bronztë në Kampionatin Evropian.
Ekipi i Kosovës i përbërë nga Fortesa Orana, Vlerë Qerimi, Behije Mustafa dhe Elmedina Istogu, mposhtën të premten përfaqësuesen e Spanjës 2:0. Por, me diferencë të pikëve, Kosova u mposht në çerekfinale nga Gjermania.
Në luftën e parë të repesazhit, Kosova e mposhti Armeninë, ndërsa të dielën do të garojnë për medalje të bronztë.
Përballë do ta kenë Përfaqësuesen e Greqisë.
Për medalje të bronztë në Evropianin e Yerevanit të shtunën do të luftojnë edhe Islam Selmani në kategorinë deri 60 kilogramë dhe Betim Maliqi në kategorinë deri në 75 kilogramë.
Ekipi i karateistëve të Kosovës i përbërë nga Betim Maliqi, Leart Gashi, Shpresim Shabani, Jakup Ajdari dhe Islam Selmani, e fituan luftën e parë ndaj Maqedonisë së Veriut 3:1, por u mposhtën më pas nga Spanja.
