Bahri Karaça, i liruar nga detyra e drejtorit të Njësisë Biznesore Miniera me Flotacion Trepça, ne Stan Terg, pas incidentit ku 13 minatorë u lënduan, ka thënë se nuk di arsyet e këtij vendimi.
Ai thotë se në e-mailin që i ka ardhur vetëm i është thënë se “Je i liruar nga detyra”.
Në një përgjigje për Tëvë 1, Karaça ka thënë se për incidentin në minierë pas rrjedhjes së acidit përgjegjësia është hierarkike dhe se para tij janë përgjegjës dy persona.
“Përgjegjës direkt për incidentin ne minierë jemi në hierarki, ku se pari vije drejtori i elektromakinerise -Sami Uka i cili ka qene organizator i bartjes se acidit, drejtori teknik- Bujar Jashari e pastaj unë. Se përse ka ardhur direkt shkarkimi im, pas asnjë vërejtje apo arsye, duke mos qenë as përgjegjës i parë për incidentin, nuk kam asnjë lloj informate”, ka thënë ai, për Tëvë 1.
11 nga 13 minatorët e lënduar janë liruar të mërkurën nga Spitali i Mitrovicës, ndërsa dy të tjerë janë duke vazhduar trajtimin por që janë jashtë rrezikut për jetë.
