Mesfushori i Dritës, Rron Broja është zgjedhur lojtari më i mirë për javën e 18-të të Superligës së Kosovës në futboll, me të cilën u mbyll edhe stinori vjeshtor.
Federata e Futbollit të Kosovës (FFK), ka njoftuar të hënën se Broja e ka fituar çmimin “Ylli i Javës”, i cili ndahet për futbollistin më të mirë pas përfundimit të secilës xhiro në Superligë.
Broja që është edhe kapiten i Dritës ishte edhe më i merituari për fitoren e ekipit të tij në ndeshjen kundër Feronikelit ’74, të luajtur në Gjilan.
Drita fitoi 2:1 me përmbysje të rezultatit, ndërsa Broja shënoi golin e barazimit dhe asistoi në golin e fitores të realizuar nga Arb Manaj.
Me këtë fitore, Drita mbetet në krye të tabelës me 40 pikë dhe shpallet kampione e stinorit vjeshtor, ndërsa Komisioni i Veteranëve ka vlerësuar lart paraqitjen e Brojës kundër Feronikelit ’74.
Pasi mori çmimin e më të mirit për xhiron e 18-të, Broja u shpreh tejet i lumtur që u vlerësua më i miri dhe shtoi se synimi i Dritës është që ta mbyll sezonin në pozitën e parë.
Broja, gjithashtu falënderoi edhe bashkëlojtarët e tij dhe stafin e Dritës, duke thënë se pa ndihmën e tyre nuk do të ishte e mundur të shpallej më i miri.
Për Brojën, kjo është hera e parë në sezonin 2024/25 që vlerësohet si më i miri dhe fiton çmimin “Ylli i Javës”.
