Zëvendësministri i Infrastrukturës, Hysen Durmishi, ka njoftuar se një person është kapur duke keqpërdorur gjatë procesit të monitorimit të provimit, më saktësisht tek Njësia e Patentë-Shoferëve në Prishtinë.
Përmes një postimi në Facebook, Durmishi ka shkruar se ndaj personit në fjalë do të ndërmerren masa sipas ligjit, kështu duke i ndaluar hyrjen në provim për 3 vite.
Njëherit, ka thënë se janë të përkushtuar për të ndaluar secili keqpërdorim të mundshëm në fushën e patentë shoferit.
“Të gjitha keqpërdorimet do t’i ndalim. Sot, në Njësinë e Patentë Shoferit në Prishtinë, gjatë monitorimit të procesit te provimit, Komisioni Monitorues ka hasur në një person të dyshimtë i cili ka qenë i pajisur me kufje dhe kamerë. Këto mjete i njëjti i ka shfrytëzuar me qëllim të dhënies së provimit në kategorinë C. Jemi të vendosur dhe të përkushtuar që të ndalojmë secilin keqpërdorim të mundshëm në fushën e patentë shoferit dhe nuk do të tolerojmë askënd të bëjë veprime të tilla. Ndaj kandidatit në fjalë do të ndërmerrën masa sipas ligjit dhe rregulloreve në fuqi dhe të njëjtit do ti ndalohet hyrja në provim për 3 vite”, thuhet në postimin e Durmishit.
Më tej, Durmishi ka shkruar se Komisioni Monitorues pasi ka vërtetuar dyshimet e tyre, kanë ftuar Policinë e Kosovës dhe se tani ndaj të njëjtit dhe autoshkollës, është hapur rasti në Polici./teve1.info/.
