Të enjten në Prishtinë është arrestuar një person i cili dyshohet se në mënyrë të vazhdueshme përmes e-maileve ka dërguar mesazhe me përmbajtje kërcënuese në drejtim të Prokurorisë së Shtetit, Policisë së Kosovës, Universitetit të Prishtinës, si dhe në drejtim të zyrtarëve të këtyre institucioneve.
Në njoftimin e Policisë bëhet e ditur se në cilësinë e provave materiale janë gjetur dhe sekuestruar pajisjet të cilat dyshohet se janë përdorur për kryerjen e veprës penale, një laptop, një tablet dhe një telefon.
Ndërkaq, i dyshuari me vendim të prokurorit është ndaluar për 48 orë.
Aksioni për arrestimin e tij thuhet se është kryer pas hetimeve disamujore të hetuesve policorë në Drejtorinë për Hetimin e Krimeve Kibernetike.
“Hetuesit policorë nga Drejtoria për Hetimin e Krimeve Kibernetike, pas veprimeve hetimore disa mujore, në bashkërendim me Prokurorinë Themelore-Prishtinë, nën dyshimin se një i dyshuar është përfshirë në veprën penale ‘kanosje’, sot më 22.05.2025, ka zbatuar urdhëresën e gjykatës ku është zhvilluar kontrolli në një lokacion në Prishtinë. Gjatë kontrollit kanë asistuar edhe njësi tjera policore. Dyshohet se personi i dyshuar, në mënyrë të vazhdueshme, përmes e-maileve ka dërguar mesazhe me përmbajtje kërcënuese në drejtim të institucioneve të Republikës së Kosovës si: Prokurorisë së Shtetit, Policisë së Kosovës, Universitetit të Prishtinës, si dhe në drejtim të zyrtarëve të këtyre institucioneve. Gjatë këtij operacioni policor është arrestuar i dyshuar, i cili dyshohet se ka kryer veprën penale ‘kanosje’ dhe në cilësinë e provave materiale janë gjetur dhe janë sekuestruar pajisjet të cilat dyshohet se janë përdorur për kryerjen e veprës penale. Në cilësi të provave materiale janë sekuestruar: një laptop, një tablet dhe një telefon. I dyshuari me vendim të prokurorit ndalohet për 48 orë”, thuhet në njoftim./teve1.info/
