Kandidati i pavarur për kryetar të Ferizajt, Bashkim Fazliu, është shprehur i bindur se në zgjedhjet lokale të 12 tetorit do të shënojë një moment historik për skenën politike të Kosovës.
Fazliu tha se beson në fitoren e tij si kandidat i pavarur për asamblenë komunale, duke theksuar se është koha që qytetarët të zgjedhin individë me ide të qarta e jo struktura partiake.
“Më 12 tetor do të bëj histori, pasi do të jetë hera e parë që një kandidat i pavarur do të fitojë për asamble komunale në Kosovën e pasluftës. Unë kam zgjedhur të garoj vet, për të treguar programin tim, jo atë që imponojnë partitë. Ma fisnike është të jesh i pavarur”, tha Fazliu në emisionin “Mesditë” në Tëvë1.
Ai ka theksuar se fokusi i tij politik do të përqendrohet në tri projekte kryesore për zhvillimin e Ferizajt, ndërsa ka kërkuar që qyteti të çlirohet nga simbolet e së kaluarës.
“Projekti im i parë është një Ferizaj pa ‘Ureshevac’. Ajo pjesë nuk është serbisht, por simbol i pushtuesit serb. Është koha që ta heqim këtë emër që s’ka lidhje me historinë e Ferizajt”, u shpreh ai.
Ndër të tjera, Fazliu kritikoi gjendjen e komunave që, sipas tij, edhe pas 26 vjetësh pas luftës, ende po merren me projekte bazike.
“Është turp kur i dëgjoj disa komuna që ende flasin për kanalizim. Çështjen e kanalizimit e kryen edhe gjyshja ime”, shtoi ai me tone kritike.
