Pjesë e një koalicioni në Maqedoni të Veriut, Lëvizja Vetëvendosje do të marrë pjesë në zgjedhjet parlamentare.
Tre kandidatë të kësaj partie, do të përfaqësojnë indirekt partinë kosovare, pasi që nuk janë të regjistruar si parti politike atje.
Megjithatë, kjo nuk shihet si interferim i LVV-së në zgjedhje.
“Vetëvendosja nuk po përfshihet, nuk po interferon prej Kosove në Maqedoni. Ka votues dhe simpatizantë të Vetëvendosjes në Maqedoni, të cilët ne si koalicion VLEN, kemi dashur që t’i përfshijmë në kampin opozitar, pasi edhe ata shumica janë opozitarë. Pra, kemi dashur që ta sjellim ndryshimin, dhe pro këtij ndryshimi janë edhe Vetëvendosja dhe përfaqëses të VV-së në Maqedoni. Por edhe Kurti qoftë në vitin 2020 qoftë edhe tani, e duan një ndryshim në kampin politik shqiptar”, thotw Afrim Gashi, kryetar i partisë Alternativa.
Pjesë e listës VLEN, janë Bekim Qoku, Nafie Selmani dhe Medine Ukshini.
Numrat bartës të tyre, vlerësohet se mund t’iu sigurojnë ulëse në Parlamentin e shtetit maqedonas.
“Vendet që i kishin marrë në listat e VLEN-it, ishin vende fituese, sidomos në njësinë zgjedhore numër gjashtë, ku është numri më i madh i votave shqiptare, në Tetovë e Gostivar. Në këto njësi zgjedhore shqiptarët zgjedhin gjysmën e deputetëve shqiptarë, rreth pesëmbëdhjetë deputetë shqiptarë. Në anën tjetër kandidati i VLEN-it, që është njëkohësisht adhurues i Lëvizjes Vetëvendoje është në katërshen, dhe në këtë njësi zgjedhore ne mund të tejkalojmë numrin shtatë. Dhe ai do të jetë njëri nga të sigurtët që do të jetë deputet në parlamentin e Maqedonisë së Veriut”, shprehet Zudi Xhelili, analist në Maqedoni të Veriut.
Zgjedhjet parlamentare në Maqedoni të Veriut do të mbahen më 8 maj.
