Në garën për t’u bërë deputetë, nga radhët e partive politike ka edhe persona që kanë probleme me ligjin. Kjo po kritikohet nga njohës të drejtësisë, madje kërkohen ndryshime tek pjesa e lejimit të kandidimit të personave që janë qoftë edhe nën hetime për ndonjë vepër penale.
Ditën dhe orët e fundit të afatit të zgjatur, partitë politike publikuan listat zgjedhore me të cilat do të garojnë për zgjedhjet parlamentare të 9 shkurtit.
Në mesin e kandidatëve për të zënë ulëset e Kuvendit të Kosovës, ka edhe persona që kanë probleme me ligjin.
Aty bëjnë pjesë ministra e deputetë aktual, e ish akterë të partive politike në nivel qendror dhe lokal.
Madje, në listë zgjedhore ka edhe persona të arrestuar së fundi nga Gjykata Speciale.
Ligji për Zgjedhje të Përgjithshme, ua kufizon të drejtën për të garuar personave që janë dënuar në tri vitet e fundit, me vendim të formës së prerë.
“Personi emri i të cilit paraqitet në Listën e votuesve nuk ka të drejtë kandidimi në zgjedhje, nëse: është dënuar në tri vitet e fundit me vendim gjyqësor të formës së prerë për vepër penale, me një ose më shumë vjet burgim efektiv”, ka thënë ish-gjyqtari i Gjykatës Kushtetuese, Kadri Kryeziu.
Por, ky ligj vlerësohet se ka nevojë për ndryshime sidomos tek kjo pjesë.
“Ligji është dashur të ndryshojë sa i përket kësaj dispozite, ku është përcaktuar afati i dënueshmërisë 1 vjet. Duhet të ndryshojë dhe të theksohet decidivisht se kandidati për deputet nuk guxon të ketë asnjë vepër penale dhe të mos jetë fare i përfshirë në vepra penale. Në momentin që është i përfshirë, ai të pres plotfuqishmërinë e vendimit apo vendimin përfundimtar dhe pastaj të futet në listë. Se është ofendim për qytetarin, me fut në listë një person qoftë vetëm i dyshuar për vepra penale, siç është korrupsioni”, avokat, Visar Rrecaj
Në zgjedhjet e kaluara parlamentare, disa kandidatë, bashkë kryeministrin aktual, nuk u certifikuan për të marrë pjesë në zgjedhje, shkak i kësaj dispozite të ligjit.
