Edhe në këto zgjedhje, nuk do të mungojnë në listat garuese individë me aktakuza të cilët ia kanë mësyrë rrugës për të fituar në zgjedhjet parlamentare të 9 shkurtit.
Garimi i tyre është në përputhje me ligjet e Kosovës.
“Ligjërisht po iu mundësohet partive pasi që ligji për zgjedhjet e përgjithshme përcakton ndalesë vetëm për personat të cilët janë të dënuar me burgim në tri vitet e fundit ky ligj ka ndryshuar nga ligji i mëparshëm i cili pat pasur si ndalesë personat të cilët kanë qenë, kanë pasur vendim përfundimtar nga Gjykata ndërsa tash është cekur vetëm me burgim. Ky është një stad i cili nuk është shumë progresiv për Kosovën, shpresojmë të ndryshoi kjo në të ardhmen”, tha Violeta Haxholli nga KDI.
Ani pse ligji nuk e ndalon një veprim të tillë, drejtori ekzekutiv i Institutit të Kosovës për Drejtësi, Ehat Miftaraj kritikon një hap të tillë.
“ Kemi përsëritur vazhdimisht se integriteti i subjekteve politike, integriteti i Kuvendit, integriteti i deputetëve të ardhshëm n’varet nëse të njëjtit ballafaqohen me procedura penale apo me procedura të tjera të cilat në një formë përfitojnë perceptimin publik se këta kandidatë nuk janë të përshtatshëm për të ushtruar këtë pozitë”, tha Miftaraj.
Miftaraj thotë se kjo ndikon negativisht edhe në imazhin e partive politike.
“Është një ndjenjë jo e mirë është një pasqyrë jo e mirë kur shohim që deputetë, ministra pozita të larta publike në njërën anë në mëngjes ballafaqohen me procedura gjyqësore në Gjykatë dhe pasdite kthehen në zyrë dhe marrin vendime. Kjo mbetet në partitë politike nëse duan lista të pastra, apo lista me kandidatë të cilët janë duke u ballafaquar në aspektin juridik me procedura penale”, tha Miftaraj.
Fushata zgjedhore për zgjedhjet Parlamentare të Republikës së Kosovës fillon me 11 janar ndërkaq zgjedhjet mbahen më 9 shkurt 2025.
