Kancelari austriak Christian Stocker të mërkurën bëri thirrje ndaj Serbisë që të angazhohet në dialog me Kosovën, duke theksuar se nuk ekziston alternativë tjetër për procesin e synuar për normalizimin e marrëdhënieve ndërmjet dy palëve.
Duke folur në një konferencë të përbashkët për media me presidentin serb Aleksandar Vuçiq në kryeqytetin Beograd, Stocker riafirmoi mbështetjen e Austrisë për anëtarësimin e Serbisë në Bashkimin Evropian, por theksoi se disa hapa duhet të ndërmerren gjatë këtij procesi.
Ai tha se integrimi gradual në fushat e transportit dhe energjisë duhet të paraprijë anëtarësimin e plotë, duke shtuar se sundimi i ligjit, si dhe pavarësia e mediave dhe e sistemit gjyqësor janë vlera kyçe të BE-së, transmeton Anadolu.
“Ne mirëpresim çdo përpjekje që do të sjellë aktorët e Procesit të Dialogut Beograd-Prishtinë përsëri në tryezë. Nuk ka alternativë për procesin e dialogut,” tha Stocker.
Vuçiq tha se ai dhe Stocker diskutuan për marrëdhëniet bilaterale, procesin e anëtarësimit të Serbisë në BE dhe disa tema të tjera kyçe.
“Austria është një vend i rëndësishëm për Serbinë. Është investitori ynë i tretë më i madh pas Kinës dhe Holandës. Falënderoj Austrinë për investimet e rëndësishme në Serbi,” shtoi ai.
Ai gjithashtu theksoi se Austria luan një rol të fortë në mbështetjen e paqes dhe stabilitetit në rajon dhe se lidhjet ekonomike ndërmjet dy vendeve mund të forcohen edhe më tej.
Lideri serb po ashtu riafirmoi se vendi i tij dëshiron të zgjidhë çështjet me Kosovën përmes dialogut.
Gjatë vizitës, Stocker gjithashtu nënshkroi një marrëveshje për bashkëpunim ekonomik me kryeministrin serb Djuro Macut.
Tensionet ndërmjet Serbisë dhe Kosovës mbeten të larta, me Beogradin që refuzon të njohë pavarësinë që Kosova e shpalli njëanshmërisht në vitin 2008.
Dialogu i Beograd-Prishtinës, i fasilituar nga BE-ja dhe i nisur në vitin 2011, synon të normalizojë marrëdhëniet dhe të çojë në njohje reciproke. Megjithëse ka pasur përparime periodike, procesi ka përballuar shpesh pengesa.
Shpërthimi më i fundit i tensioneve ndodhi në korrik, kur autoritetet e Kosovës arrestuan një zyrtar serb, gjë që bëri që Serbia të pezullonte pjesëmarrjen e saj në bisedimet për normalizim.
