Federata e Futbollit e Kosovës (FFK) ka njoftuar se stadiumi kryesor i Kampit Nacional në Hajvali do të rritet në kategorinë e katërt, duke i hapur rrugë mundësisë që përfaqësuesja e Kosovës në futboll të zhvillojë në të ndeshje kualifikuese.
Ky zhvillim është pjesë e një projekti të gjerë për përmirësimin e infrastrukturës së futbollit në vend, duke përfshirë vendosjen e 14 mijë ulëseve në stadium, shkruan në njoftimin e FFK-së të enjten pas mbledhjes së Komitetit “hat-trick” të UEFA-s të mbajtur në Prishtinë.
Ky investim do të mundësojë që stadiumi në Hajvali të plotësojë kërkesat e UEFA-s për zhvillimin e ndeshjeve ndërkombëtare.
Aktualisht, vetëm stadiumi “Fadil Vokrri” në Prishtinë plotëson kriteret minimale për ndeshjet kualifikuese, duke u përdorur si vendi kryesor për ndeshjet e kombëtares dhe ato të klubeve kosovarë në garat evropiane.
Ky përmirësim do të ofrojë më shumë mundësi për zhvillimin e futbollit në Kosovë dhe për t’i dhënë Kombëtares një mundësi më të madhe për të luajtur përpara tifozëve të saj në më shumë lokacione.
