Shiriti i policisë është i vendosur në rrugën “Hajrullah Zymi” në Fushë-Kosovë.
Këtu, u godit për vdekje një grua e moshuar nga një kamion që po qarkullonte këtë rrugë.
E lajmin e konfirmoi edhe Policia e Kosovës, ku dhanë detaje rreth këtij aksidenti.
“Sot rreth orës 10:00 kemi pranuar informatën se në rrugën “Hajrullah Zymi” në Fushë Kosovë, ka ndodhur një aksident trafiku me pasoja fatale. Në këtë aksident, kanë qenë të përfshirë një këmbësore dhe një automjet në lëvizje (kamion) . Si pasojë e aksidentit, lëndime të rënda trupore ka pësuar këmbësorja e cila nuk ka arritë të përballojë plagët dhe e njëjta ka ndërruar jetë . Vdekjen e viktimës e ka konstatuar ekipi mjekësor në vendngjarje. Aktualisht policia ka nisë një hetim për zbardhjen e rrethanave që kanë quar deri te ky aksident trafiku, ndërkohë që ngasësi automjetit është shoqëruar në stacion policor” , thuhet nga policia.
E pas ekzaminimit të vendit të ngjarjes, trupi i pajetë i viktimës u dërgua për obduksion në Institutin e Mjekësisë Ligjore.
Nën emocione u panë edhe disa persona afër vendit ku ndodhi aksidenti.
E një dëshmitare që po thotë se e pa gjithë ngjarjen, tregon se është tmerruar.
Kurse disa banorë të kësaj lagjeje po thonë se duhet pasur më shumë kujdes dhe shtim të kontrollave ndaj tyre që vozisin me shpejtësi të madhe.
Ndryshe, para dy ditësh në këtë komunë, edhe një këmbësor tjetër është shkelur për vdekje në Bresje.
