Belgzim Kamberi nga Instituti “Musine Kokalari”, vlerësoi që me marrëveshjen e 18 marsit në Ohër, serbët e Kosovës do të kenë një status më të përparuar e të avancuar.
Sipas Kamberit, çështja e Asociacionit do ta marrë trajtën e vet varësisht nga normalizimi i marrëdhënieve Kosovë-Serbi.
“Por, ajo që është e qartë, është tashmë që serbëve të Kosovës po u ngritet pozita kundrejt komuniteteve tjera jo shumicë. Tash edhe me këtë marrëveshjen e Ohrit, është e qartë që për serbët e Kosovës do të ketë një status më të përparuar, më të avancuar. Asociacioni i komunave me shumicë serbe do ta marrë trajtën e vet nga perspektiva se çfarë normalizimi të marrëdhënieve do të ketë”, deklaroi Kamberi në emisionin “Info Nata” në Tëvë1.
Njëherit, Kamberi tregoi se çfarë mund të ndodhë në qoftë se me të vërtetë do të ketë normalizim të marrëdhënieve.
“Nëse Serbia vazhdon qasjen e njëjtë ndaj Kosovës, natyrisht që edhe Asociacioni i komunave me shumicë serbe, nesër do të ishte më shumë në shërbim destruktiv. Në anën tjetër, nëse e kemi një situatë të vërtetë të normalizimit të marrëdhënieve, atëherë Asociacioni do të ishte në shërbim të integrimit”, deklaroi Kamberi tutje./teve1.info/.
