Deputeti shqiptar në Parlamentin serb, Shaip Kamberi, ka thënë se presidenti i këtij shteti, Vuçiq, bashkëpunimin e tij me Qeverinë e Kosovës po e paraqet si tentativë për destabilizim dhe krijimin e Shqipërisë së Madhe, raporton teve1.info
Përmes një statusi në Facebook, Kamberi ka shkruar se bashkëpunimin me shtetin amë e lejon edhe Kushtetuta e Serbisë.
“Të drejtat janë universale, ato nuk janë mëshirë e shtetit
Ka disa herë që presidenti i Serbisë Aleksandar Vuçiq, bashkëpunimin tonë institucional me qeverinë e Republikës së Kosovës e paraqet si tentativë për destabilizim dhe “krijim të Shqipërisë së Madhe”.
Si një ndër të drejtat fundamentale të pakicave, Kushtetuta e Serbisë, e parasheh edhe “bashkëpunimin me shtetin amë”.
Patur parasysh këtë, afërsinë gjeografike, lidhjet e përditshme e tradicionale, sidomos ato institucionale me Republikën e Kosovës, janë parakusht i avancimit të pozitës dhe mirëqenies së Shqiptarëve në Luginë të Preshevës.
Pse e pengon kjo presidentin e Serbisë dhe deklarohet kundër normës fundamentale kushtetuese?
Pse për presidentin e Serbisë qenkan destabilizuese marrëdhëniet tona normale me Kosovën, ndërkohë që sipas tij janë konstruktive aventurat e tij në çdo cep të Ballkanit Perëndimor ku jetojnë serbët?”, ka shkruar ndër të tjera Kamberi.