Përfaqësuesja e Lartë e BE-së, Kaja Kallas, në datat 7-9 prill, do të udhëtojë në Mal të Zi, Shqipëri dhe Bosnje-Hercegovinë.
Por, në vizitën e saj të parë në Ballkanin Perëndimor, Kallas nuk do të vizitojë Kosovën, kështu bëhet e ditur në faqen zyrtare të BE-së.
Ndërkohë, Kallas në Mal të Zi, do të takohet me presidentin Jakov Milatoviq dhe kryeministrin Milojko Spajiq.
Ajo do të takohet gjithashtu me organizata të shoqërisë civile dhe do të marrë pjesë në një rishikim të pajisjeve të financuara nga Fondi Europian i Paqes me ministrin e Mbrojtjes të këtij vendi.
Ndërkaq, në Shqipëri, Kallas do të takohet me presidentin Bajram Begaj dhe kryeministrin Edi Rama.
Përfaqësuesja e Lartë Kallas do të takohet edhe me ministrin për Europën dhe Punët e Jashtme, Igli Hasani dhe ministrin e Mbrojtjes, Pirro Vengu.
Ajo do të hapë bashkërisht Dialogun e parë BE-Shqipëri për Sigurinë dhe Mbrojtjen me ministrat Hasani dhe Vengu.
Gjithashtu, ajo do të marrë pjesë në nënshkrimin e marrëveshjeve të grantit dhe kredisë së Bankës Europiane të Investimeve për zhvillimin e hekurudhës Durrës-Rrogozhinë.
Përfaqësuesja e Lartë Kallas do t’u drejtohet edhe studentëve të universitetit dhe përfaqësuesve të shoqërisë civile.
Ndryshe, redaksia i ka dërguar pyetje BE-së dhe është në pritje të përgjigjes se pse Kosova nuk është në agjendën e saj për vizitë./teve1.info/
