Deputetja e Aleancës për Ardhmërinë e Kosovës (AAK), Time Kadrijaj deklaroi se qëllimshëm po bllokohet konstituimi i kuvendit. Ajo tha se presidentja Vjosa Osmani duhet t’i adresohet Gjykatës Kushtetuese lidhur me afatet ligjore sa i përket propozimit për kryeparlamentar.
Pas dështimit të shtatë për konsitutimin e plotë të legjislaturës së nëntë të Kuvendit të Kosovës, deputetja Kadrijaj tha se partia fituese nuk ka bërë asnjë përpjekje për sigurim të votave.
“Nuk ka asnjë angazhim dhe nuk ka asnjë ndryshim. Këto vota po përsëriten, këto 57 vota të famshme të Albin Kurtit që do të thotë kaq vota për qeveri. Pra, qëllimshëm me kandidaten e propozuar për kryeparlamentare po donë ta bllokojë situatën në Kosovë. Kjo është një realitet, ata s’kanë bërë asnjë lëvizje sepse nëse do të kishin bërë ndonjë angazhim për sigurim të votave, së paku do të kishin siguruar edhe një votë edhe të bëjnë një ndryshim për një votë. Rezultati po përsëritet në vazhdimësi dhe unë po mendoj që këta qëllimshëm po e bëjnë me kandidaten e propozuar”, deklaroi ajo.
Deputetja Time Kadrijaj tha se presidentja Vjosa Osmani duhet t’i adresohet Gjykatës Kushtetuese që të ketë një afat kohor se deri kur mund të propozohet emri i njëjtë për kryeparlamentar.
“Duhet të ndërhyjë ndoshta edhe presidentja në bazë të afatit dhe përgjegjësive kushtetuese që i ka sepse kjo nuk mund të shkojë në pafundësi kështu. Ndoshta, Gjykata Kushtetuese nuk e ka sqaruar afatet kohore me vendimin që e ka marrë. Por, ndoshta nëse presidentja i adresohet Gjykatës Kushtetuese së paku limitohet koha sa ka të drejtë, ka të drejtë të zgjedh kryeparlamentarin jo deri në pafundësi por të caktohet së paku një periudhë kohore ku ata që dëshirojnë ta zgjedhin kryeparlamentarin dhe formimin e qeverisë ta kenë një afat kohor deri kur mund ta propozojnë”, u shpreh ajo.
Kryetari i Aleancës për Ardhmërinë e Kosovës, Ramush Haradinaj nuk ka qenë i pranishëm sot në seancë, për çka deputetja Time Kadrijaj tha se ka qenë i angazhuar me obligime të tjera.
