E ftuar në emisionin “Ditari” në Tëvë 1, Kadrijaj ka rrëfyer për kohën kur kishte shërbyer si mjeke në UÇK gjatë luftës me forcat serbe, teksa tregon se më së shumti kishte qëndruar në Malësinë e Gjakovës.
“Unë kam qenë në malet e Koshares, në malet në Malësinë e Gjakovës dhe besoj që prej së largu kur i shihnim ato zona duke u djegur kam menduar që ndoshta do të jetë një ëndërr e jona shekullore se a do të vije ndonjë ditë liria. Kur e shikonim prej maleve lartë, i shikonim si digjeshin shtëpitë, kishim skepticizmin ndoshta a do të arrijmë edhe pse çdo ditë zhvillohej luftë, përparonin forcat e UÇK-së drejt Kosovës, prapë ishte hamendësimi se a do të arrinim lirinë”, shtoi ajo.
Tutje, ajo tregoi se lajmin për çlirimin e vendit e kishin përjetuar mjaft mirë për shkak se kishin mall që “t’i shihnin qytetet dhe fshatrat dhe ta përqafonin dheun vendlindjes”.
Kurse, 23 vjet pas, ish-pjesëtarja e UÇK-së thotë se vazhdojnë traditën e vizitave në vendet ku qëndronin gjatë luftës, për t’i përkujtuar të gjithë të rënët në luftën me Serbinë.
“Po i vizitojmë shpesh sepse ne atje kemi një ritëm të organizmit të përvjetorëve të dëshmorëve të heronjve e betejave. E kemi Epopenë e Dukagjinit ku festohet fillimi i luftës frontale, më pas më 9 prill Epopeja e Koshares ku gjithë bashkëluftëtarë, invalidë tubohemi i përkujtojmë atje në varrezat e dëshmorëve”, shtoi ajo./teve1.info/
