Tash e mbi tre vjet banorët e fshatit Lubizhdë të Hasit ndihen të rrezikuar nga shtyllat elektrike gati të rrëzuara dhe telat e kabllot e rëna në tokë. Ata shprehen të zhgënjyer nga KEDS-i, pasi kërkesat e tyre për zgjidhje të problemit nuk u morën asnjëherë parasysh.
Janë të lidhur me njëri tjetrin.
Nga shtyllat gati të rrëzuara, telat e energjisë elektrike kanë rënë edhe në tokë.
Disa prej tyre kanë rënë edhe mbi varre.
E kjo gjendje në varrezat e fshatit Lubizhdë të Hasit po i shqetëson banorët e këtushëm.
“Këto kabllat shumë probleme bëjnë. Edhe për të vdekurit edhe për ata që po vijnë me i varrosë rahmetlitë. Probleme ka, vijnë edhe lopë, hyjnë edhe këndej. Vijnë besa fëmijët me i kontrollu me i këqyrë lopët; telat po shihen tash s’kam çka me ju tregu, po shihen krejt të ramë për toke. Është shumë shqetësuese, shumë, se nuk është një problem që nuk munden me e ndreqë, duhet me e ndreqë këta”, thotë Gëzim Nerjovaj, banor i fshatit Lubizhdë.
Problemi i njëjtë është edhe në mes të fshatit.
Tellat e rrymës atje janë të lidhura mes degësh, fare pranë trotuarit.
E pikërisht nëpër të kalojnë çdo ditë nxënësit për të shkuar në shkollë.
Ndërsa për të mos u rrëzuar, shtyllat elektrike po mbahen me drunj.
Prandaj banorët shprehin zhgënjimin e tyre me KEDS-in, pasi sipas tyre, kërkesat e bëra tash e tri vjet nuk po merren parasysh.
“Ka më shumë se tri vite që janë në këtë gjendje. Janë jashtëzakonisht rrezik sidomos po flas për fëmijët të cilët udhëtojnë në këtë trotuar dhe vijnë në shkollë po edhe për të gjithë banorët e fshatit Lubizhdë. Të gjitha kërkesat që i kemi adresu në KEDS as që merren parasysh nga KEDS-i, as nuk janë të interesum me bo zgjidhje”, shprehet Bekim Nerjovaj, ish-kryetar i fshatit.
Tëvë1 ka pyetur KEDS-in nëse është në plan të ndërmerren masa për rregullimin e shtyllave dhe telave të rënë në tokë, mirëpo deri në publikimin e kronikës të njëjtët nuk kanë kthyer përgjigje.
