Kabineti i kryetarit të Kuvendit të Kosovës, ka reaguar lidhur me pamjet ku disa fëmijë, nxënës të një shkolle janë shfaqur duke mbajtur fotografinë e kryetarit Glauk Konjufca në duar gjatë vizitës që i kanë bërë Kuvendit të Kosoës, në prag të14 vjetorit të pavarësisë së Kosovës.
Ilir Skender Kërçeli, shef i kabinetit të Konjufcës, ka thënë janë kundër kësaj praktike, duke shtuar se një veprim i tillë ka ndodhur pa dijeninë e tyre.
“Pajtohemi që nxënësit e shkollave të ndryshme të Kosovës të bëjnë vizita në institucionet e Republikës së Kosovës dhe të njoftohen nga afër me punët e institucioneve të vendit. Një veprimtari e tillë ka ndodhur vazhdimisht edhe në të kaluarën. Mirëpo jemi kundër kësaj praktike që fëmijët të mbajnë në dorë fotografi të figurave politike. Fëmijët e kanë botën e tyre të pastër dhe të pafajshme dhe duhet të mbahen larg fenomeneve të tilla. Por për këtë janë përgjegjës mësimdhënësit. Shprehim keqardhje që një gjë e tillë ka ndodhur pa dijeninë tonë”, ka shkruar ai në Facebook.
Ndryshe ky veprim ka ngjallur reagime të mëdha në drejtim të kryetarit të Kuvendit, Glauk Konjufca.
