Paraditen e së shtunës filloi zjarri në një pjesë.
E brenda pak minutash i gjithë objekti u përfshi nga flakët.
Në këtë hotel që u kaplua nga flakët në Brezovicë, u evakuuan të gjithë pushuesit.
E nga ky incident, nuk pati të lënduar mirëpo dëmi vlerësohet se është i konsiderueshëm.
Zv.komandanti i zjarrfikësve të Ferizajt, tregoi se ende nuk e dijnë arsyen që ka shkaktuar këtë, mirëpo ka rrezik për shembjen e objektit.
“Pasi kemi marrë lajmin, zjarrfikësit janë nisë me një automjet cisternë me rreth 12 mijë litra ujë, ka mbërri në vendin e ngjarjes dhe kanë filluar t’i ndihmojnë zjarrfikësit që kanë qenë prezent këtu për ta shuar zjarrin. Pastaj ka ardhë edhe ekipi tjetër dhe për momentin zjarri është lokalizuar vetëm po presim se ka rrezik me u shembë ndërtesa për arsye se është e djegur tërësisht pothuajse dhe po rrijmë në gjendje gatishmërie për të shpëtuar objektet tjera që janë përreth”, tha Jeton Avdiu.
E rastin e konfirmoi edhe Policia e Kosovës, ku treguan se po hetojnë rastin.
“Zjarrfikësit po punojnë për të lokalizuar dhe shuar zjarrin, ndërsa policia po bënë sigurimin e zonës përreth. Aktualisht, nuk ka raportime për të lënduar, ndërsa dëmet materiale janë të konsiderueshme. Në vendin e ngjarjes kanë dalë edhe hetuesit për të përcaktuar shkaqet e zjarrit. Për çdo informacion shtesë, do të bëjmë njoftime në vijim”, thuhet nga Policia e Kosovës.
Tëvë1 ka mësuar se sipas dyshimeve të para, zjarri është shkaktuar nga oxhaku i hotelit.
Derisa rruga u bllokua për qarkullim dhe vizitorët që ia kishin mësyrë Qendrës së Skijimit nuk u lejuan të kalojnë për disa orë.
