Qarkullimin në mesditë ishte më i lehtë.
Por, banorët e Vranidollit, daljen nga fshati e kishin më të vështirë, mëngjesin e së hënës.
Krejt kjo, pas reshjeve të borës të së dielës mbrëma.
Ky shtyri që vet t’i drejtohen Komunës së Prishtinës.
“Sot në mëngjes kur jemi zgjuar ka qenë këndej sikur akull i patinazhit. E thirra drejtorin e shërbimeve publike në Komunë i tregova për problemin. I thash kështu e kemi fshatin lagjen e epërme të poshtme si dhe lagjen e “Verbovce”është patinazh krejt akull, i thash a ka mundësi me intervenuar me na dërguar do kripë me na e hapë rrugën më tha qe menjëherë po intervenojmë nuk ka kurgjo hiç. Tash ka filluar me shkri Zoti edhe po vjen uji poshtë, si zakonisht këtu në lagje na merr uji gjithmonë”, u shpreh kryetari i fshatit.
Një banor tjetër, thotë se situatën po e vështirëson, edhe gjendja e keqe e rrugëve.
“Kur ka reshje kështu të mëdha të borës vijnë dhe e pastrojnë në ndërkohë edhe kanë vendos edhe krip. Jo, jo nuk ka pasur ekipe se edhe nuk ka ndonjë borë siç po shihet është e kalueshme. Po mungesën e kemi të rrugës asfalti është shkatërruar i tëri, kanalizimi nuk është i mirë”, u shpreh një banorë.
Për këtë, kryetari i fshatit ka një kërkesë për Komunën e Prishtinës.
“Kërkesa jem primare në këtë kohë është që këta akulla me i ndjetë gati brenda mundësive më i shkri deri në pranverë. Se në paraverë na kanë thënë qe kanë bo projekte për rrugë, kanalizime dhe ndriçime”, ka thënë tutje kryetari i fshatit.
Ndërkohë, në një përgjigje për tëvë1, Drejtori i Shërbimeve Publike në kryeqytet, Luftar Braha, ka thënë se gjatë ditës ekipet e pastrimit dolën në terren për pastrimin e rrugëve.
Por situatë më rënduar, u pa të dielën mbrëma në rrugët e kryeqytetit.
Situata e krijuar gjatë reshjeve të borës në rrugën “Mon Balaj”, përplasi nivelin lokal me atë qendror.
Fillimisht, komunarët thanë se përgjegjësia për pastrimin e kësaj rrugë, është e Ministrisë së Mjedisit, Planifikimit Hapësinorë dhe Infrastrukturës.
“Segmenti i rrugës “Mon Balaj”, në Kodrën e Trimave, është në përgjegjësi të Ministrisë së Infrastrukturës. Pavarësisht ndarjes së kompetencave, Komuna ka intervenuar mbrëmë dy herë në këtë segment rrugor, duke vepruar me vendosmëri për të parandaluar rrezikun dhe për të garantuar sigurinë në qarkullim”, thuhet në njoftimin e Komunës së Prishtinës.
Por, të shpejtë në reagim, ishin nga ministria.
“Sqarojmë se MMPHI nuk e ka në kompetencë mirëmbajtjen e segmentit të rrugës “Mon Balaj”. Ky segment është nën përgjegjësinë e Komunës së Prishtinës, e cila edhe ka ndërhyrë në këtë pjesë të rrugës”, thuhet në reagimin e MMPHI.
Nga kjo ministri, kanë bërë të ditur se përgjegjësia e tyrë fillon tek segmenti rrugor nga Bernica në drejtim të Komunës së Podujevës.
