Janë rikthyer para Qendrës Klinike Universitare të Kosovës, por jo për të qenë në krye të detyrës por kësaj radhe me pankarta në duar për të kërkuar rikthimin në punë.
Punëtorët e sigurimit fizik, që dikur ruanin dyert e këtij institucioni, sot qëndrojnë jashtë tyre, duke kërkuar rikthim në vendin e punës nën menaxhimin e QKUK-së dhe kushte më të dinjitetshme pune.
Ndërprerjen e kontratave nga Qendra Klinike Universitare e Kosovës ata e kanë quajtur të papranueshme duke theksuar që 280 familja po rrezikojnë të mbesin pa të ardhura.
“Na këtu me diskutu pesë orë mundem, pe shihni edhe vet kjo s’ka ndodhur në regjimin e ish regjimit po ndodh tani në liri të Kosovës, 280 familje i kanë lanë jashtë i lanë në rrugë kjo është më të vërtetë shumë për keqardhje, kjo s’ka koment fare mirëpo kjo ka lidhje me pushtet kta janë militantët e tyre këtu mbrapa që i bojnë këto sene”, tha Ismet Ibishi.
“Le ta din drejtori le ta din kryeministri le ta dinë te gjithë qe edhe ne kemi fëmijë, edhe na punojmë për fëmijët tonë”, tha punëtori Daut Bibaj.
E një tjetër grevist tregoi sfidat ekonomike që po përballon me shtatë fëmijë në shkollim.
“I kam pesë vajza dhe dy djemë krejt i kom në fakultete me qitë rrogë i kom majtë qysh kom mujt, jom prej fshtatit Llodrovc Komuna e Malishevës jetoj në Fushë Kosovë”.
Kurse dikush renditi shpenzimet mujore që ka.
“Krejt punëtorëve të sigurimit ia kanë ndalë rrymen se pa pagesë ku me marr me pagu rrymen 70,80,100 euro. Me rrymë e ki ujin, bukën krejt shpenzimet i ki. Rrymen e kanë nalë, këta rrymën e kanë pagu prej neve, ktyne sju nalet rryma se e kanë pagu prej neve. Neve na kanë qitë, krejt popullin, punëtorët e sigurimit i kanë qitë në rrugë, punëtori më i vjetër i QKUK-së jam”, deklaroi ai.
Kryetari i Sindikatës së Punëtorëve, Hifzi Sylejmani, thotë se janë të ngarkuar me padrejtësi të shumta dhe mungesë zgjidhjeje konkrete.
“Na jemi me halle shumë të mëdha si punëtorë në QKUK edhe kemi shumë padrejtësi brenda institucionit të QKUK-së. Këtu është çështja e këtyre tenderave, çështja e rikthimit me menaxhim të brendshëm te na ka ndërhy çështja e menaxhimit të brendshëm, kemi kogja oferta edhe prej ministrisë edhe prej drejtoreve të SHSKUK dhe QKUK qe me na kthy me menaxhim të brendshëm por na nuk i mohojmë edhe kompanitë e tjera me të cilën kompani qe na të ja fillojm punës nuk kemi diçka kundër”, tha Sylejmani.
Ndërsa Jusuf Azemi nga Sindikata e Punëtorëve të Sektorit privat thonë se Institucionet kanë mundësi ta zgjedhin këtë brenda pak ditësh, nëse kanë vullnet.
“Ne kemi ardhë në konkludim përkundër asaj qe kemi hulumtuar ne KRPP, në OSHPE dhe na është thënë që të gjitha dyert e hapura dhe duart e lira i ka QKUK-ja të vendosë për tenderin, ne fundi fundit kemi informacione zyrtare nga të gjithë që OSHP-ja dhe KRPP-ja qe ky tender mund të zgjatë maksimumi 3 ditë dhe nese është vullneti dhe dëshira e QKUK-së mund të përfundojë brenda tri ore”, tha Azemi.
Jusufi ka paralajmëruar që greva do të vazhdojë çdo ditë nga ora 10 deri në ora 3 deri sa të ju plotësohen kërkesat.
Televizioni para pak ditësh ka kërkuar qëndrim për këtë çështje edhe nga QKUK-ja por nuk ka marrë përgjigje.
Kronikë e realizuar nga gazetarja – Jona Kelmendi
