Profesori dhe eksperti i politikës së jashtme dhe çështjeve të Ballkanit, Edward Joseph, ka thënë se kryeministri i Kosovës, Albin Kurti, mund të përballet me presione të njëjta si ato ndaj presidentit ukrainas nga Donald Trump, por është në pozita edhe më të pafavorshme se Zelensky.
Sipas Joseph, kryeministri Kurti nuk ka mbështetjen e plotë të BE-së apo Britanisë së Madhe, pasi është përballur vazhdimisht me kritika.
“Nëse kryeministri Kurti rikthehet si kryeministër, atëherë ai, dhe të gjithë në Kosovë duhet të presin presion shumë të lartë nga administrata Trump. Kryeministri Kurti mund të përballet me të njëjtin trajtim si ai që Trump i rezervoi Zelenskyt. Dhe kryeministri Kurti nuk është në pozita të njëjta me Zelenskyn”, ka thënë ai.
Tutje, Joseph ka theksuar se Kurti ka pasur kritika edhe nga administrata e mëparshme e ShBA-së.
“Presidenti ukrainas ka mbështetje të madhe evropiane, ka mbështetje të madhe nga Mbretëria e Bashkuar. Kryeministri Kurti nuk e ka këtë mbështetje. Për kryeministrin Kurti ka kundërshti dhe kritika nga Bashkimi Evropian dhe nga Mbretëria e Bashkuar. Duhet gjithashtu të kuptojmë se kryeministri Kurti kishte kritika edhe nga administrata e mëparshme në SHBA, ajo e Bidenit.
Prandaj kjo nuk është diçka që ka të bëjë vetëm më Donald Trumpin. Kjo ka të bëjë me frustrimin në të gjitha këto vende perëndimore me lidershipin e kryeministrit Kurti, përveç problemeve që kanë me Serbinë”, ka potencuar ai në një intervistë për A2CNN.
