Analisti politik, Albinot Maloku, thotë se asnjë qytetar i Kosovës nuk mund t’i ndryshojë e keqinformojë shkrimet që kryetari i Kuvendit, Dimal Basha i ka përmend në artikullin ku thuhet se UÇK-ja është financuar me para të drogës.
Kështu tha Maloku, pas deklaratës së kryeministrit në detyrë, Albin Kurti i cili e quajti deformim dhe keqinterpretim artikullin e Bashës, i cili është bashkautor me Jana Arsovska.
Pas kritikave të shumta që i mori në publik për artikullin “Globalizing the Western Balkans: Transnational Crime, Fundamental Islam and Unholy Alliances”, Basha në konferencë për media tha se e vetmja pjesë që e ka shkruar ai është kapitulli mbi fundamentalizmin islamik.
E për këtë, Maloku thotë se ajo çfarë ka shkruar Basha është e dëmshme për Kosovën.
Madje ai thotë se është tragjedi, kur interpretimet e tilla për islamin në Kosovën pranohen si të mirëqena.
“Kurti përmendi shprehjen deformim dhe keqinterpretim. Askush në Republikën e Kosovës për këto fakte të nxjerra nuk deformojë dhe nuk keqinformojë asgjë. Vetëm treguan që ka qenë tentimi për t’i ikë që për mua është deformim, ku provon njëri nga autorët dhe thotë diçka që edhe kjo është tragjedi e llojit tjetër, ku e merr si të mirëqenë ‘unë nuk kam fol për UÇK-në, por kam fol për islamin në Republikën e Kosovës dhe kjo mirë jemi në rregull me të’, por çfarë ke shkretuar o autor në çështjen e islamit në Kosovë. Kjo është tragjedia më e madhe, ku pranohet si e mirëqenë të gjitha ato shkretime për islamin në Kosovë, ku merren si të mirëqena dhe tejkalohen pa problem dhe kjo nuk është kurrfarë problemi. Kjo është e dëmshme në bazë, në rrënjë, në thelb”, tha ai në emisionin “Këndi i Debatit” në Tëvë1.
/teve1.info/
