Jashari për Tëvë1 tha se pas vendimit të sotëm, do ta kundërshtojnë Gjykatën Speciale derisa të veprohet me drejtësi.
Ai tha se Gucati e Haradinaj janë dënuar padrejtësisht.
‘Edhe Gucati edhe Haradinaj nuk e kanë merituar që të dënohen padrejtësisht. Të gjithë atë që kanë thënë se nuk e njohin një gjykatë të tillë, që e kanë kundërshtuar një gjykatë të tillë, sot me të vërtetë është faktuar që ajo është gjykatë krejtësisht politike, ku të gjitha ato aktakuza që janë ngritur ndaj pjesëtarëve të Ushtrisë Çlirimtare të Kosovës janë politike, ne do ta kundërshtojmë një gjykatë të tillë dhe presim që tutje të veprohet me drejtësi”, tha Jashari në emisionin “Ditari”.
Jashari tutje tha se tendenca e Gjykatës Speciale në bashkëpunim me Prokurorinë e Serbisë është ta barazojnë luftën e pastër të Kosovës ndaj atyre çfarë ka bërë ushtria e policia serbe në Kosovë.
“Presim lirimin e dy kolegëve tonë sepse është një e padrejtësi e madhe, tendencat dhe qëllimet po dihen tanimë që në bashkëpunim me prokurorinë e Serbisë janë për të barazuar luftën e pastër të Ushtrisë Çlirimtare të Kosovës me të gjitha ato që ka bërë ushtria dhe policia serbe në Kosovë”, shtoi tutje ai.
