Kryetari i SBASHK-ut, Rrahman Jasharaj i ka kërkuar Ministrisë së Arsimit që këtë vit furnizimi me libra të bëhet nga MASHTI duke i dërguar tekstet shkollore në shkolla.
Po ashtu ai ka kërkuar nga Qeveria të bëjë rritjen e koeficientit për mësimdhënës dhe të plotësohen edhe kërkesat tjera të anëtarësisë.
“Kryetari Jasharaj kërkoi që furnizimi me tekste shkollore këtë vit të bëhet nga MASHTI duke i dërguar tekstet shkollore në shkolla si dhe të ketë libra të rinj për të gjithë nxënësit e nivelit fillor dhe të mesëm të ulët, pra nga klasa 1 deri 9. Kryetari i SBASHK-ut, z. Rahman Jasharaj kërkoi nga zv. Ministri Kelmendi që Qeveria të bëjë rritjen e koeficientit për mësimdhënës dhe të plotësohen edhe kërkesat tjera të anëtarësisë, të cilat në formë të shkruar ia dorëzoi zv/ministrit Kelmendi”, thuhet në komunikatën e SBASHK-ut.
Këto kërkesa Jasharaj i bëri në një takim me zëvendësministrin e Arsimit, Taulant Kelmendi , me të cilin diskutoi për fillimin e vitit të ri shkollor, pakënaqësitë dhe kërkesat e mësimdhënësve karshi Qeverisë.
Sipas njoftimit të Sindikatës, zëvendësministri ka premtuar se do t’i shqyrtojë me kujdes këto kërkesa të SBASHK-ut.
“Nga ana e tij, zëvendësministri Taulant Kelmendi premtoi se do t’i shqyrtojë me kujdes kërkesat e SBASHK-ut e pastaj informoi kryetarin Jasharaj për angazhimet dhe përgatitjet që po bën MASHTI lidhur me vitin e ri shkollor,” thuhet në njoftim./teve1.info/.
