Sulmuesi i Gjilanit, Senad Jaroviq është shpallur lojtari më i mirë për xhiron e 28-t të Superligës së Kosovës në futboll.
FFK-ja, të hënën pasdite ka bërë të ditur se Jaroviq e ka fituar çmimin “Ylli i Javës”, i cili ndahet për futbollistin më të mirë pas përfundimit të secilës xhiro.
Përzgjedhjen e më të mirit edhe këtë herë e ka bërë një komision i veteranëve të futbollit, i cili ka konstatuar se Jaroviq pati paraqitjen më të mirë në vikendin e fundit. Në fakt, Jaroviq shënoi dy gola në fitoren 4:0 të Gjilanit në shtëpi kundër skuadrës së Fushë Kosovës.
“Faleminderit ekipit dhe trajnerëve që kanë shumë merita për këtë përparim që kam bërë. Ju premtoj se do të jap gjithçka nga vetja për të arritur qëllimet e SC. Gjilani, që këtë vit të siguroj mbetjen në ligë pa barazh, ndërsa për vitet e tjera do të kthehemi me ambiciet e mëdha të një klubi si SC. Gjilani. Të gjithë në Kosovë na kanë pritur mirë, jam pozitivisht i befasuar me nivelin e futbollit këtu, me transmetimin televiziv të ligës dhe me sistemin VAR”, tha Jaroviq për faqen zyrtare te FFK-së.
Aktualisht, Gjilani është në pozitën e shtatë në tabelë me 30 pikë, sa i ka edhe Feronikeli ’74 por që është i teti.
