Dega e Partisë Guxo në Deçan, së bashku me kryesinë dhe kryetaren, ka dhënë dorëheqje kolektive nga të gjitha strukturat e këtij subjekti politik.
Lajmin e ka bërë të ditur kryetarja e deritanishme e degës, Rabije Haklaj, përmes një deklarate publike, ku tha se vendimi është marrë unanimisht në një mbledhje të mbajtur më 8 mars.
“Së bashku me Kryesinë e Degës dhe në unanimitet të plotë morëm vendim që të japim dorëheqje nga të gjitha strukturat e Partisë Guxo, si dhe dorëheqjen kolektive dhe të parevokueshme të Degës së Partisë Guxo në Deçan”, thuhet në deklaratën e saj.
Haklaj theksoi se arsyeja kryesore e këtij vendimi është qëndrimi i partnerëve politikë dhe i vetë partisë ndaj mundësisë së kandidimit të presidentes Vjosa Osmani për një mandat të dytë.
Sipas saj, refuzimi për ta mbështetur Osmanin për rizgjedhje ka shkaktuar zhgënjim të madh te struktura e degës në Deçan.
“Ajo që ndodhi këto ditë jo vetëm që na indinjoi, por edhe na zhgënjeu pa masë. Refuzimi për të mbështetur presidenten Vjosa Osmani për një mandat të dytë për ne është i papranueshëm dhe i pafalshëm”, ka deklaruar Haklaj.
Ajo shtoi se dega e Guxo në Deçan do të vazhdojë të mbështesë frymën rugoviane dhe presidenten Osmani, pavarësisht largimit nga partia.
“Do të vazhdojmë të qëndrojmë të palëkundur në bindjet tona dhe krah presidentes Vjosa Osmani, kudo që rrugët tona politike do të na çojnë”, përfundon deklarata.
